တာချီလိတ်မြို့နယ် ၀မ်ပုံရွာတွင် ရဲများ တိုက်ခိုက်သတ်ဖြတ်ခံရခြင်း

တာချီလိတ်မြို့နယ် ရွှေတြိဂံဒေသ မိုင်ဖုန်းအုပ်စုရှိ ၀မ်ပုံရွာတွင် အခြေချသည့် ရဲစခန်းမှာ စခန်းမှူးအပါအ၀င် ရဲဝန်ထမ်း ၁၂ ယောက်နှင့် ဒေသခံပြည်သူ့စစ် နှစ်ယောက်၊ စက်လှေမောင်းသူ တစ်ဦး စုစုပေါင်း ၁၅ ယောက်အဖွဲ့သည် ဖေဖော်ဝါရီလ ၂၀ ရက်နေ့ နေလည် ၂ နာရီခန့်တွင် မဲခေါင်မြစ်အတွင်းတွင် ရက်စက်စွာ ပစ်ခတ်သတ်ဖြတ်ခြင်းခံ ခဲ့ရကြောင်းသိရပါသည်။ တွေ့ရှိရသည့် အလောင်းများကို တာချီလိတ်မြို့သို့သယ်ယူလာပြီး မြို့အတွင်းနာရေးကူညီနေသည့် ရှမ်းဘုန်းတော်ကြီးကျောင်း ဖြစ်သည့် မဟာမုနိဘုရားကြီးကျောင်း(မကာဟိုခင်းရပ်) တွင် ထားရှိသည်။ ၂၁ ရက်နေ့တွင် အလောင်း ၆ လောင်းရှိပြီး ကျန်တာပျောက်ဆုံးနေကြောင်းသိရသည်။ ဆေးရုံတွင် အတွင်းလူနား နှစ်ဦးရှိနေကြောင်း အခြေနေမကောင်းကြောင်း ဒေသခံများပြောနေကြသည်။ အခင်းဖြစ်ပုံကို တိတိကျကျ မသိရသေးပါ၊ အများဟိုတစ်စဒီတစ်စပြောနေကြတာတော့၊ မူးယစ်ဆေး သွားဖမ်းရင်း တစ်ဘက်မှာ အင်အားများများဖြင့် ပြန်လည်လက်တုန့်ပြန်ရာမှာ အားလုံးကျကုန်ကြောင်း၊ တချို့ကတော့ အကြံဖန်သွားလုပ်ရင်း တစ်ဘက်က အညိုးနဲ့ အကွက်ကျကျ တိုက်ခိုက်ကြောင်း၊ တချို့ကတော့ ငွေတောင်းတာလွန်လွန်းလို့ သည်းမခံနိုင်တော့လို့ လက်တုန့်ပြန်ကြောင်း အမျိုးမျိုးထင်ကြေးပေးနေကြကြောင်းပါ။ တာချီလိတ်မြို့နယ်ရှိ ရွှေတြိဂံ ဒေသ မိုင်းဖုန်းလမ်းသည် ပြည်တွင်းသို့ တရားမ၀င်ကားများ ကို အာဏာပိုင်များနှင့် အပေးအယူလုပ်သွင်းရာလမ်း၊ ဒေသတွင်း မူးယစ်ဆေး သွားရာလမ်း၊ လူမှောင်ခိုနည်းဖြင့် ထိုင်းကို ၀င်ရာလမ်းအဖြစ် ဒေသတွင်းမှာ ထင်ရှားပါသည်။ ယခုလို ဖြစ်စဉ်မျိုး ၂၀၀၈ ခုတွင်လည်း ဖြစ်ခဲ့ဖူးပါသည်။



အထက်ပါပုံများသည် ၂၁ ရက်နေ့ နေ့လည် တွင် ဘုန်းတော်ကြီးကျောင်းတွင်း ဇရပ်တွင် ထားရှိသည့် ရဲအလောင်းများဖြစ်သည်။